Losed Lüüt, mer händ es Problem
mer händ e kei Goali, so wie ich das gsehn.
Das send d'Wort gsi vom Trainer
as liebe Volk vo Eishockeyaner.
S'het gheisse Freiwilligi vor,
denn de Meischteschafts-Iisatz esch in Gfohr.
Applaus, Applaus a die erschti (ond einzigi) Wahl
do han ich no nüt gwösst öber die Qual.

S'Trainingslager esch no glimpflich verloffe
es händ jedoch vell Speler de Bögg is Goal ine troffe.
Au de Moskelkater fascht obligatorisch
öbrigens ned s'letscht Mol, wo er ufträtte esch.
Ptötzlich hets aber ernst gollte, ond zwar us vollem Rohr
en Gägner in Secht: die erschti rüse Gfohr.
Uii, das het jo nor so klöpft und dätscht
hoffentlech han ich mer dodebi nüt quätscht.

D'Bögg send nor so vor minere Nase omegfloge
Langiwiil, das wär jo gloge.
Ich han müese luege, dass ich naa mag met schnuufe,
denn die Andere send grausam schnell uf ehrne Kuufe.
Während em Motch Spannig puur
besser als jedi Adrenalin-Kur.
A de Konzentration hets ned dörfe fehle
söscht hesch nämlech en Bögg a de Kehle.

I de Goali-Schuel han ich vell Nois erfahre
ich ben mer aber au gsi em Klare,
dass ich muess versueche
alles i e Matchsituation verbueche.

Bi de Hei-Spel han ich ned eso chöne brilliere,
aber kei Grond zom mech z'schiniere.
D'Nervosität isch natürli dopplet so gross
ond of em Herz en rüse Kloss.
Do esch eim nüt guets glonge
s'Goal het d'Bögg von elei verschlonge.

Of d'Onderstötzig vo de Mannschaft han ich jederzüt chönne zelle
Sie händ genial gschpellt, wenn's händ welle.
Zom zueluege vo hende es Träumli
wenn's klappet het met em Zämeschpeli.
Oises Motto för de Gägner en Graus:
volle Pulle vorausl!

Im Grosse ond Ganze han ich total Gfalle gfondedra
ich han natürli au huffe Glöggli gha.
Nöchschti Saison - Holz alänge
hoff ich, dass mer's au guet werd glenge!